12/JAN--- 晨咁早就去到機場，出發果陣好期待，因為係第一次搭飛機，嘻嘻！ 一開波就衰左，真係唔老黎！我地去到桃園機場，諗住搭巴士去酒店check in，點知架巴士明明宗寫住去台北，咁我地就拿拿臨擺行李同上車，點知擺完行李準備上車之際，個站務員就同我地講話去酒店唔係呢架車，要搭下一架！Shit...於事我地極速將我地d行李攞返出黎，情況非常騎呢，好彩有驚無險，之後就搭下一架車去酒店check in。 酒店係台北小巨蛋斜對面，好大好靚好舒服，五星級即係五星級，只係個外牆比較舊左d！settle 好晒就開程去西門町，果度好多野街邊檔，好多野食，但唔算係好好食，所以都無乜印象，淨係記得Fiona 同Becky 同個賣果汁既男仔影左張相！ 之後就去左紅樓劇場買d特式既野，果度好多野都係DIY，所以感覺比較另類！之後就返左酒店訓！
13/JAN--- 天氣凍左好多，去左附近既麥記食早餐之後就搭捷運去左自由廣場，即係以前既中正紀念堂果度睇下野，地方真係好大，好靚，個中正像好大，我地仲影左好多搞笑相！ 之後就去左故宮博物院，嘩，又係好大好宏偉既旅遊點，個博物院一共有三層，裡面既燈光非常暗，令我地有昏昏欲睡既感覺！所以行左一層，大家都頂唔順，好有默契地用OK 既手勢表示要放棄故宮博物院，OK Tour 就因而得名啦！哈哈！ 去左淡水，正所謂，''行過情人橋，日日俾仔撩''，本住呢句Slogan 大家都行得好開心，仲影左好多相，尤其是係飛圖果d相，簡直係正啊！而情人橋本物都幾靚，尤其是夜晚果時，個感覺都幾浪漫，(雖然我唔識呢樣野！)，但係行果時都幾大雨，都有d狼狽！所以就去左附近一間cafe 避一避，果間cafe 係海邊，好似間溫室咁架，而d 野飲果度仲有唔同既樣，都幾得意幾靚！ 之後就去左溫泉酒店浸溫泉，其實只係一個可以容納六個人既大浴缸，一路浸，一路猜圍枚潑水，玩得好激！之後就返酒店附近既華西街夜市搵野食，但係好多檔口都收左，不過好彩仲有一檔未收，不過果度d魯肉飯好好味，食到飽飽就返酒店啦！
14/JAN--- 呢日簡直係成個trip既重點，九份同十分！我地去到台北車站轉火車去瑞芳，去到瑞芳，個''死肥佬站長''就係咁叫我地買飛，好似d買飛錢係佢袋咁，買完飛就叫我地去月台搭車，之後我地就睇左路線圖，知道搭三個站就到站，大家一上到車就訓，去到第三個站，個站名唔係好對路，不過我地都無落車，好彩突然有個technician 行過，我地問佢去十分幾時落車，佢就話呢個車係去宜蘭同花蓮架，我地搭錯車，佢話我地應該係瑞芳搭一個站到侯桐轉車，所以我地應該下一個站落車搭返轉頭，去到瑞芳去侯桐轉車去大華同十分！呢個事令我地體會到有乜野都要問左先！
下一個站係頭城，我地即刻落車，岩岩對面月台有車，我地即刻跑過去，上到車，果個technician 就做手勢話我地上岩左車！好彩遇到呢個technician，如果唔係去到宜蘭就大獲啦！搭到去瑞芳，又見到果個''死肥佬站長''，佢又叫我地俾買飛，我地話買左，佢就叫我地俾飛佢睇，真係頂佢個肺，死PK黎架！問佢下一班車幾時有，佢又唔知講乜春，之後我地問另一個人，佢就話架車到左啦，快d過去對面月台上車！我地又跑去上車，真係辛苦！去到侯桐，我地落車轉車，於是我地問個站務員，佢話上返呢架車就得，挑那星，真係玩死，個鐵路system 點會咁shit 架！ 幾經辛苦，我地終於到左大華，十分瀑布係大華同十分站中間，所以我地諗住係大華站落車行去十分，點知.....一落車，鬼影都無隻，淨係聽到d雞啼聲。頂，果時下晝四點幾，啼乜鬼啊！想上山之際，見到有舊大石同好多碎石，似係岩岩山泥傾瀉完，所以我地都唔行山路！之後問個阿叔，佢話去十分瀑布要沿路軌邊行十五分鐘，聽落好危險，但係果時大家豁左出去，一開始我地一個跟一個咁行，唔知邊個話要報數，我心諗，行路軌果陣已經令我諗起N年前KCR廣告果個鬼故，宜家仲要報數，六個人報完，有人報七咪死，梗係唔報啦！行過一陣，見到條樓梯，上到去有隻狗狂吠，我地即刻落返路軌邊，路軌邊越行越窄，說時遲，那時快，有架火車到，我地即刻慌忙閃避！於事，我地就即刻返轉頭落車去十分就算啦！ 上到車，睇返條路，其實真係唔係路，好窄，窄到完全行唔到，而十分瀑布都好普通，無乜特別，去到十分食左少少野，買左木板post card 就走啦！ 之後出返台北，去左樂也食任食既打邊爐同韓燒！d野好好食，好新鮮，仲食左好多雪榚梳打！之後返酒店！
15/JAN--- 食完早餐去左袖珍博物館，果度d野好靚，無論係大型建築物，以至到一個小小既麵包，都整得好細緻，像真度極高，而仲有一部報稱係全世界最細既電視機，真係好細部！
之後去左搭貓空纜車，上到車，景色好靚，好高，望得好遠！上到去貓空，食左聲稱係牛肉麵比賽既亞軍，食之前好有期望，食完之後就覺得不外如是，係香港食毓X牛肉麵好過！ 夜晚就去左士林夜市，d野食都同其他夜市差唔多，都唔係咁特別，最特別係有個檔口叫''吉利鹵味''.....哈哈！之後返左酒店劈酒，玩得好癲，仲見到Toni飲醉酒行唔到直線，哈哈，大家都盡興返房！
16/JAN--- 去到旅程既最後一日，可能受到之前果晚既酒精所影響，大家都無精打采咁。晨早係酒店pack野check out 果陣整爆左個密碼鎖，之後去左鼎泰豐食早餐，d野都ok好食，d waitress 著晒短裙咁，wow！之後，我地去左台北101參觀，真係好高好宏偉，不過果日好大霧，見唔到個頂！
之後去左國父紀念館，冒住俾人鬧既危險同個站崗既軍人影相，而佢地真係完全唔郁！做軍人真係辛苦啦！睇埋佢地步操既儀式就去機場啦！ 去到機場，經過Hello Kitty既育嬰室同候機室，四名女仕就好似癲左咁瘋狂既相，連人地個哺乳室都唔放過，我真係O晒咀！ 之後就上機，而五日四夜既OK Tour 就咁完左啦！ 今次個旅行真係好正，完全係食得招積，住得舒適！好多謝Toni既詳盡既計劃，令到成個trip 都好充實！當然仲好多謝妳，雖然妳之前都去過幾次台灣，妳都肯陪我去！希望我地下次會有一個更好更開心既旅行啦！ | 
